Horror Tackle

政府食撚屎

2006-12-15T08:44:00.000+08:00

放人！

天星@雅虎討論版

2006-12-15T00:54:00.000+08:00

其實無論反動定改革，香港人的廣東話都確係勁。
cu forum 真係蚊脾同牛脾！

問題︰你贊成清拆中環舊天星碼頭嗎？

精句一

果班靚仔呢世仔都未坐過踎廁既屎坑疴過屎，何來有集體回憶！！點解突然講歷史和文化？！！佢地讀中史同近代史都肥佬！忽然疴屎！！

精句二

小弟想問香港是母親還是父親呢？如果香港是母親的話，應該父親和母親連繫才是的，不要分離才對。應該將維多利亞港填平，又有土地可賣，交通又可解決，可樂如不為呢？小弟不想聽人運用借口吧！

精句三

孔敏兒斬細路坐12年，政府斬鍾樓應該坐幾多年？

精句四

政府呀~~請尊重我的民意。我絕對支持拆卸鐘樓，我唔需要一切都留在面前先有回憶……我好懷念些泛民人士出1000蚊人工既日子，請尊重我的回憶，出番1000蚊人工俾佢地就夠（唔好浪費我地些稅款），唔該哂！！！

精句五

大陸解放後，50年代初我來到香港，住在新界鄉村，山明水秀，覺得香港好靚，
尤其是出九龍的青山公路，由屯門搭16號巴士車票$0.90，成條青山公路彎彎曲曲，綠野處處，風光如畫，賞心悅目，但如今我已不想出去了，因為香港發展得有如飽死的暴發戶，咀臉越來越醜陋，人心也越來越醜惡，所有好看的東西都扔掉！唉，香港，不再令我再愛的地方！

精句六

culinary63 （洗碗老野）提到︰
「你知道50年前香港係點樣架？我就知呢！！！」
〔你我他回應︰〕
「食龍口『甲醛次硫酸氫鈉』（吊白塊）毒粉絲啦 63。吹水你就叻（lak）。
睇真啦！」
〔然後貼了一堆香港歷史照〕

精句七

你老豆夠舊啦！唔見你地換個老豆

精句八

曾陰權我x你x母，你好攪唔攪係到攪屎棍，好地地一個代表香港既文物你做乜x野要拆左佢呀？你個良心去左邊x到呀？你係咪痴x左線呀？你個腦係咪有問題呀？？？佢阻你好多地方呀？你同果d拋老豆老母去老人院果d雜種狗有咩分別呀？？？大家一齊出黎遊行保護鍾樓啦！個鍾樓陪住我地一齊大架~

精句九

係囉係囉，D友仔好似問佢集體回憶佢都唔知係乜，企地D回憶係電腦D鹹相，
係D日本集體非禮4仔回憶，Delete左可以Download再下載，同係家中玩XYZ自拍自弊回憶。
集體回憶 = 集體網上Share鹹相的回憶
拆左佢池堂佢就真係知乜野叫懷念啦。

精句十

墨之道，兼愛為本，摩頂放踵，私一己以利天下…民主也，少數服從多數…回憶嗎？秀茂坪木屋區、慈雲山徙置區、長沙灣工廠大廈、船塢、越南難民營、大磡村、大角咀凳船、浴德池、大笪地、大排檔、中國染廠、虎豹別墅、荔園、宋城、德雲茶樓…這當中也有不少人的回憶，現在呢？

精句十一

cckthomas200……拆拆拆，我拆埋你池堂添呀。

精句十二

果斑衝入去示威嘅友仔係職業示威者！有錢收！黎智英聘嘅！同斑民主派議員互相配合做大龍鳳！時薪200元！

精句十三

好彩公道自在人心-資訊咁發逹，d民主派唔可以呃到人囉

精句十四

那個郭家麒又出來煽動，昨天電視台下午節目因尊重他是醫生，邀請他在直播節目中談食物衛生，他卻乘機煽動觀眾仇視大陸，早幾日他在城市論壇亦故意煽動觀眾反政府反中央，此親英走狗議員叵心可惻！再看那斑所謂示威者，大部份為十多廿歲青年，有鏡頭對着他們就又擺post又笑，有些刻意赤裸上身甚至男女均刻意將褲子褪至露股博出位，我問他們搭過小輪未？他們說搭過，但他們答不出任何年份的船費，亦答不出天星碼頭的大事年表，跟着說︰【我冇搭過小輪唔俾抗議拆卸呀，郭家麒民主派都叫我地來示威就一定係啱！】由此可見他們只是一斑受民主派教唆利用來攪事而又愛出風頭的人！

精句十五

贊成拆舊天星碼頭！
同時于其政府左右為難，不如將鐘樓拍賣O左去啦！
等班熱愛古物人士可以去競投！政府又可以增加收入！
買O左個鐘樓番去班人可以招待同道之士參觀，
又可以擺係屋企當門鐘或仍然十五分鐘報時一次。

精句十六

我支持拆天星，因我要回憶！
所以要拆天星碼頭！以增強你們對它的回憶！唔拆你們何來回憶！

原文見雅虎討論版

天星@有線新聞台

2006-12-14T23:34:00.000+08:00

熊一豆的〈我的反拆天星筆記一〉將守衛天星的意義扯至新的反殖戰，是除李智良的〈並非懷舊〉外最有生產性的觀點的論者。（我總是偶然就憧憬香港可以獨立的）

現場的抗爭情緒越去越爛仔︰真係冇得唔支持了。

因為各種原因，我自己當然繼續無恥地扮旁觀者清，但如果有人去，不妨加一條口號或橫額︰「係呀，我地就係要阻住你開工。」，又或，「係呀，犯法呀，拉我啦。」

咁咁咁囉。博拉真係幾時都係最有效、最令人鼓舞的抗爭方式。程序理性、甚至程序正義，唔該收皮、仆街、再收皮。

___________

如何駁上中大俾了錢的全日有線新聞台，可逕自致電賤精超，6198-3913。

風乾中大

2006-12-14T15:41:00.000+08:00

身體異常乾澀。十二小時活動就累得驚人。賽馬及足球並沒有帶來平日應有的充電功能。你知道我知道，哪裏都需要一度門，讓人與鬼在夾縫中找到橫渡生活的轉捩點。

基士文星夜獨行

2006-12-14T03:29:00.000+08:00

無聊及其數字

費倫巴治主勝（1.65） x 阿仙奴讓球客勝（2.85） 2x1 100
費倫巴治和（3.40） x 阿仙奴讓球客勝（2.85） 2x1 10
費倫巴治主勝（1.65） x 阿仙奴讓球和（3.30） 2x1 10
費倫巴治和（3.40） x 阿仙奴讓球和（3.30） 2x1 10

費倫巴治讓球主勝（2.90） x
阿積士客勝（1.70） x
阿仙奴讓球客勝（2.85） 3x1 20
____________

分析︰

唔駛諗，繼續阿仙奴，落後曼狗十八分，戰意高。問題係贏幾多球。阿積士，有前冇後且生無可戀，情況與阿仙奴類同。至於費倫巴治則因土耳其主場勁。

紅旗威揚大戰金獅駿將

2006-12-13T18:32:00.000+08:00

全晚馬膽︰

屢敗屢戰兼有馬咩飛的「華心寶」

是夜提供︰

1.「友活力」串「華心寶」位置，2x1，100
2.「靈光七號」、「馬駿寶」、「健康大師」鐵角連贏串「開心小子」、「乖巧」、「上浦勝將」鐵角連贏，2x3/30，90
3. 「紅旗威揚」搭「金獅駿將」單位置連贏。20
4. 位置過關中左咪買埋100蚊「衝鋒鎗」獨贏囉。廿五蚊以上才買。卅蚊以上則超抵。

分析︰

今日形勢最緊湊的是第七場，所以睇跑馬啦。「皇帝出巡」雖然五戰兩捷霸氣凌人，但個排檔真係爭小小囉，而且稚氣未脫。預計「超力旺」或「紅旗威揚」其中一隻放頭，另一隻則拍住韋達的金獅駿將守第二位。番到直路隻「超力旺」應該冇料到啦，而「皇帝出巡」又要視乎際遇才知道能否追上。咁，「紅旗威揚」同「金獅駿將」都好有機入三甲囉。

天星的你，或保守的我

2006-12-13T05:49:00.000+08:00

突然睡不著。李智良在獨媒說自己是「逃兵」，心裏並不好受。想起寒風下在天星碼頭堅持到底的朋友，連逃兵都談不上的我，心情當然是更他媽的。

不過，無論對他們本人多麼支持，又或如何認同一場「市民vs政府」的鬥爭中的市民一方，這件事我都無法好好對待。

還是覺得︰整件事最應該支持的是衝入地盤的爛仔抗爭方法，而不是議題本身，甚至也不是市民這種身份。

我們是在如此「強政勵治」的一個社會嘛。如果少數人做，少數人認同，主流論述的吸收方法就是異端。如果少數人做，多數人認同，主流的吸收方法就是割裂式的英雄主義。如果多數人做，多數人認同，這就危險了︰因為這就多少說明了抗爭過程中採取令人舒服安心的觀點。

例如，在這個議題中，殖民地時代的地標的種種鄉愁想像、高雅文化想像、旅遊文化想像，一定是抗爭者得到民心、得到著數的資源之一。偏偏，這些主流想像，同時正正是構成了別的困境的兇手。

到最後，真正得到「甚麼」的可能只有參與者，因為大家有機會得到不同程度的體驗。身體經驗絕對是寶貴的東西。我必須說，在身體經驗的這個維度來說，我在八樓的時間實在太短。必須說，很留戀那些僅有的經驗。

話說回來，我真心的不覺得天星有甚麼值得保留。留下了一個半個名氣響亮的地標，就能為善忘的城市召回它的歷史維度嗎？實在未免有點癡人說夢。

更可怕的是︰這些被美麗包裹的地標真的留下來了，更有生氣的更有機的歷史空間卻在無聲無息中把抽走剝掉——地標式歷史想像與輕鬆自在的「集體回憶」取代了「真實」、多義、難受、歧路百出的歷史。過程中，我們的政府交了貨，市民可能仲真的會收貨添。

希望阿仁、公園仔、阿周等人有被kum、有煙食吧。一日有煙食，一日有抗爭。阿們。

______________

p.s. 這就是做《學生報》的痛苦了。如果我是學生報的一份子，天星其實真的非關心不可。它既上了主流傳媒，就絕對是兵家必爭之地。我希望有一天真的能與《學生報》無乜關係吧。

無聊廣告 999

2006-12-12T19:09:00.000+08:00

中大學生報
12月號現已出版左，將近一個禮拜 lu。

40版全彩印刷
10000份散落校園及各區青年文化聚腳點
新增情色、體育、學術、專欄、遊戲等版面
一切睇你唔晒，俾你睇晒。

網上版︰http://cusp.hk
電郵︰cusp@cusp.hk
電話︰26036404
廣告、派發、乜叉查詢︰66911520 Adrian

擺放及派發地點︰

利黃瑤碧樓信和樓工程學大樓 MMW 鄭棟材樓　火車站觀光橋
范克廉樓華連堂　利樹培堂　何宿　明華堂　五高　五低　神學樓
文質堂　文林堂　學思志文　知行　紫霞　湯宿　伯宿　陳舍
恆生樓　國宿　二宿　眾志堂　樂群館張祝珊師生大樓
辰衝　新思維書店　港大　理大　浸大　城大　科大　教院
嶺大　森記書局　Kubrick　田園書店　樂文書店　尚書房　
愉林書店　博學軒文星圖書　紫羅蘭書局　Cafe Anyroom　薯仔屋
White Black Caffe　Special Cafe　Life Cafe　Pink House　Second Home
Herba Cafe　Dragonese Cafe & Lounge　各區青年空間
明愛香港仔社區中心　基層大學勞資關係協進會　互惠市場　White Noise Record　The Panic　沙田火車站　大埔墟火車站

內容如下︰

社會
禁煙來了！——一個煙民的悲嘆
深水普旅遊指南
repeat又repeat之重建「改善生活」篇
世貿一年，有人諗翻起︰龍尾到告士打道天橋
世貿一年，有人諗翻起︰某教授的全球化課程

專題︰有泥就有機
開始有機
有機耕種，我感
點解有點解冇
認證你，是有機
有機的迷思

專題︰2006香港社會論壇
社會論壇前言
踢爆新自由主義
迎接社會論壇的火頭——一次由國際至本土的翻譯
移工之歌不卑亢
從美國右翼基督福音派思考香港社會論壇
社會論壇活動日程
清潔工金姐勞動生涯
跨境社會運動硬撼中國勞工剝削——訪大學師生監察無良企業行動

校園
陰謀論中大加教院深入協作——英語研究及教育文學士課程
校園短打99
玩盡舞台的晚上——2006四院劇賽
教你如何接受 UC Can
鐵路人生的缺口
別在語言迷宮裡迷路——語文規劃與語文作育的再議
要「最低工資」不要銷售稅！——長毛夜話記
鼠患？——學生會會室天花跌隻老鼠落黎

學術
理想政治

情色
太子戲院食屎食著豆，或相反
Stephy信箱

淫穢繪本
非性非非性︰我們的巴士在哪裡？

體育
綠茵場外二三事——訪中大超聯會長
廣州醫藥1比3負河南建業
降班就是降班！——記一次球場抗爭

投稿
致香港中文大學雙語政策諮詢委員會意見書
安能辨我是雄雌

活動資訊
12月︰請你去個社會度填色

專欄
sms紀事︰晚上的吐露港
凍茶少甜︰引蛇出洞
情陷夜中大︰躋身
示威與你
我與示威

文藝
交換到你唔記得——亂談小克的《偽科學鑑證1》
完美的劉華，其實就是最冇態度的劉華——關於《墨攻》極端主流的部分
乜都得小小，好似呢篇影評咁——《德州電鋸殺人狂︰成魔之路》

遊戲
上位填字遊戲之血腥教科書

小克黑，洞

2006-12-12T18:53:00.000+08:00

交換到你唔記得︰
亂談小克的結集《偽科學鑑證1》

文︰阿邊個
鳴謝︰小克提供相
原刊《中大學生報》12月號

警告︰我話唔係spoiler你都唔信啦但文字又spoil到幾多漫畫呢

中產工具abc

我對《東touch》或者沒有偏見，有時最多覺其無聊一點濫情一點，至少不像《明報》強裝中立、安全又幸福。零二年的時候認識了幾個大學生︰其中一個整套中產生活的工具都齊備，有西伯利亞雪橇叫不出型號的新手提與數碼相機一個月租四五千的單位一堆看不完的影碟一set band房才會有的鼓當然還有，好多好多期《東touch》啦。

冇雷或好彩的我

所以當我知道小克與他的老友楊學德的結集原來是他們《東touch》的專欄後，我必須強調我是感到一定程度上的遺憾︰點解遲了幾年先留意這兩個人及這種寄居於潮流雜誌的創作空間呢。Once in a lifetime，我竟然矯情到覺得自己冇雷。當然，一氣呵成睇結集，我相信感受一定強烈太多，我是〈好彩〉的讀者。

溫文地暴露

事情不忘又兜轉頭來過。小克在《路漫漫——香港獨立漫畫25年》中的直接又溫文儒雅，真的忽然令人感到所有七字頭後青年的微暗末路與狂飆鄉愁。他說︰「本地的觀眾水平真是很差很差。」這種坦白甚至不僅是向著一個虛幻的公眾的暴露，更同時是對訪問／編輯《路》書的智海或歐陽應霽的一種既親和又直露的坦白︰《路》又有幾多讀者丫。

倚傍

他另一個洞見則是如果有日周街都有獨立漫畫，反而未必是好事，香港有一個王家衛就夠晒數︰獨立當然是標籤啦，它可能意味著對「主流」的排拒，但同時，一定是要倚傍著主流來定義自己的商業位置。

印數之鬥大或者鬥細

弔詭的地方是︰本土漫畫中稱得上是主流的已經越來越少。《瑕疵鞋》或者「飯戲劇場」的作者江康泉在同一本書對獨立漫畫的劃界是︰「數量的分別，就是讀者群、習慣和印刷數量。」讀者群或者閱讀習慣可能江康泉等都真的處於下風，但《明報》偶然會有智海或江的作品，《東touch》已是楊學德與小克的地頭了，較諸我提不出名字的本土武俠作品，單談印數，他們也不落下風罷。

因此，獨立的意思——還是一個個靈魂的獨立吧。（古典的廢話，權充過場之用。）

夾硬唔理，再黎過。寫這篇文時，其中一個最應該咬死不放的切入點其實應該是楊學德的作品。即，透過對比楊這套座標，我們就可以同中見異志知道小克的特點了blahblahblah。但是楊的作品的力度來自傳統戲劇語言的建設及distortion，要認真而局部地講他好像很難，不過，當然可以夾硬講。

老總的刻板印象

例如，最經典而廢話的講法是援引《東touch》老總曾金成的創作指引︰阿德來自九龍藍田，就「屋村市井」；小克是灣仔人，就「清新雋永」。阿德的角色通常行樣衰，而且都行得ok盡，用色大力好多，七彩的分鏡之間營造出班爛的森嚴；小克則淡色淡色淡色，線條通常幼多少，角色個樣正常多少，個畫面亦因為角色個樣同埋用色較淡而 clean 多少，情節氣氛（而非主題）似乎較諸阿德冇咁嚴肅——這兩種畫風的確就是指向曾金成所講的地緣美學政治的分野——如果這不是因老總指引而生產出來的 stereotype 的話。

見到才算知道

不過，上面一段全是廢話，楊學德與小克其實不易分辨。兩書中都有一個section是兩人合作出來的。小克《偽》書中的「八十年代特輯」還算清晰，你一拳我一拳，像班馬條紋的彼此相間。但楊的《標童話集》中「藍色大門」一節則係哼哼哼，一定要望見是created by 邊個我才勉強覺得是阿邊個畫的。

藍色魔界

如果一定要講的話，這一節「藍色大門」是兩本書中最好睇的，不獨獨因為十一歲惡魔人（陸光榮）的性格吸引易於代入（代表性自白為︰「對於天真無邪既弱小心靈，我更會毫不留情咁狠心打爆！」），更重要的是格局森嚴而極擅爛gag的藍田派戲劇大師阿德遇上看似清純的灣仔插畫設計師——結果不是誰勝誰負，而是可以看清小克的拿手好戲︰他利用白兔bitbit的清潔感加上重覆又重覆的象（8.8〈軟化〉／8.9〈象人〉），將「魔童魔象拍住上」變成「魔童陪得bitbit耐搞到近朱者赤最後埋成魔象」，並在分鏡上完整地破壞了阿德的典型情節感。

交換所有

阿德當然唔講得笑還以顏色，8.10〈硬左〉中魔象結果敵不過認為佢只係「搞笑」同「得意」的小女孩，逃離民居。旁白是︰「是穿鑿附會……是生安白造……」「墮進陰暗的角落」「人靚則歌甜」「冇錢則仆直」。LYRICS上這裏不但呼應了小克8.6〈偽科鑑證〉的副題「墮落天使」，仲直chur埋去魔童正極而邪、變成魔象前夕的旁白「聲和則響清」「形正則影直」。連個「直」字都食埋，由童話、反童話、魔幻童話再次一次過拖回去現實生活中血淋淋的具象童話。「冇錢則仆直」是魔象夢醒的契機，「形正則影直」才是活人成魔之道。這個組合童話的最終教訓雖然 clique，但動用的語言錯綜複雜，兩個作者交黎交去，所以真係唔講得笑。

大膽一點講︰如果唔係有交換呢下野或者小克反情節感的作風，阿德的one-piece有機戲劇風格是無法營造呢個幅度的主題的變奏的。

狄寶娜摩亞

如果利用以上講「藍色大門」的方法翻轉頭望小克書中的「八十年代專輯」，幾乎同樣咁掂。楊學德的〈睇戲〉講怕醜遲熟半樣衰小男生想溝女，最後用盡心機，反而俾男同學搞掂，連friend都冇埋，男男女女走淨佢。當中不但有「狄寶娜摩亞靚過狄美摩亞」的港式洞見，埋尾小男生哥哥撩小男生去睇兩點半小男生唔騷佢的空白感，更直接呼應前篇〈一比一四四〉中小男生撩小男生哥哥砌模型後者唔睬佢一節，主客角色互換，但一樣係寫盡卑微小男生的「我的心事有誰知」。

回合那麼小克版的〈睇戲〉呢？他的睇戲回憶叫〈回合〉。第一頁就好正路的。開頭就梗係八十年代，好正常，兩個男仔好friend咁兩個人一個位係今日已經拆左的百樂睇史太龍的《洛奇第四集》，史太龍贏左佢地不但振臂歡呼，散場後出到巴士站仲練兩拳添。

粒粒跌落黎第二頁馬上就調動新的、混亂的繪畫視點。坐在擂台上的不是史泰龍，而是他自己。還有紅色的母親在旁教練一樣自說自話。還有橙色的女孩甲坐在遙遠的台下，且是唯一的觀眾。還有換上了可以放爆谷的電影院椅子、百樂戲院收皮後代之而起的百樂商業中心。九一一的雙子塔。世貿前警察把地上坑渠蓋（如果蓋？）焊接密封的畫面。還有那個兩名小夥子揮拳相向的巴士站，如今當然冇人。最後一格是主角一人坐在擂台邊，橙色女孩都走埋。上面有一粒粒野跌落來，唔知是香港的雨還是美國的雪。雪仲要係從那個沒有人的巴士站中跌下來的。

默劇俗套到盡的情節格局——母子代溝、情人朋友離散、物是人非、世界大亂，男孩在真實都會的轉變中無力如失敗的拳手，當年屏幕上的史泰龍不過呃細路。但是他有能力只用畫面交代，沒有一句旁白（這幾乎是兩半書中僅見的）而且後半部的視點有真正的 multiplication。

這就是小克改變情節感的能力。

揮

如果你嫌〈如果．菜〉或〈十分．菜〉取笑情歌似酸菜得黎太過直線的話，就真係不如睇〈如果．蓋〉啦。最後八格急轉直下，突然唔再係掀蓋kum蓋，而係釘蓋，棺材蓋個蓋。都可以話同〈回合〉有得小小揮下。

又翻轉頭講左咁耐，其實前面都唔係要講的。真正要講的係好多漫畫書唔會有的東西︰關於技術的分析。

科學鑑證

小克這本《偽科學鑑證》中以科學語言姿態出現的技術篇，至少有〈淥麵〉（創作人夜深人靜搜索枯腸之際如何煮好一隻即食麵）、〈布丁〉（小克教你點整備有小克簽名的「小克香滑芒果布丁」）、〈bitbit教你造filee公仔／filee反過黎教你造bitbit公仔〉、〈水彩〉（水彩作為英國佬的重要遺物或小克作為水彩的多年用家）、〈好彩〉（點樣可以好好用到d水彩）……嘩，好多「科學」！如果〈淥麵〉一節教飢腸轆轆的「創作人」分清楚麵面麵底令我覺得發人深省，如果布丁公仔我多數唔會試而因此唔知佢up得好唔好，咁我就唯有講下最後的〈水彩〉及〈好彩〉了。

有術才能美術

只講幾句︰〈水彩〉全篇情深款款，最後卻說要鳴謝Winsor & Newton的代理may小姐——難免令人覺得是小克迷了呢隻牌子多年之後唔自覺咁幫人做埋advertorial。〈好彩〉就勁好多，我細個時上左十二年美術都唔知廣告彩、水彩、塑膠彩的用色方法／原理有乜分別！美術美術，香港地並冇術！（令我諗起所有分唔清楚「四二三一」、「四三一二」、「鑽石」同「聖誕樹」既足球評述員！）

復刻的光環？

不過，〈好彩〉尾段試範左一次正確用色，再「復刻」一次理工大學裏面一個而家已經俾人拆了的courtyard，作為小克當年「方法錯了」的見證……此舉則令我大有疑問——點解唔係當年果張假d、亂d同埋靚d呢！可見美學標準的判斷可以refute晒美學的技術！

東touch！

所以，終於講到戲肉喇。就係一開場既〈黑洞〉。一系列扮科學的插畫，講的竟是假字的概念。假字是甚麼呢？就係扮字囉。是但擺d字係本書度，令你覺得有字，好爽好科學好現代好完整。邊度最多「假字」呢？咪就《東touch》呢d咁預左俾人飛走一半睇相既書囉！

所以，〈黑洞〉作為小克登陸《東touch》的開山之作，一開始就refute了本書！我寫左三千幾隻假字都refute唔到自己篇文。小克，確係勁！

墨攻之密窿

2006-12-12T18:42:00.000+08:00

完美的劉華，其實就是最冇態度的劉華
——關於《墨攻》極端主流的地方

文︰阿邊個（以後都會係我）
原刊於《中大學生報》12月號

浪費了十年

《大公報》說，連同籌備構思，張之亮幾乎用了十年在他最近的作品《墨攻》之上。就算不看《大公報》，也會覺得張是在潛心磨劍吧——印象中他上一部戲已是梅艷芳的《慌心假期》了。（還是《自梳》？）但是，《墨攻》和其他張藝謀等的無聊大製作其實都冇乜分別。令人覺得導演花在統御大場面、設計大製作的心力都是白耗的——尤其是張之亮畢竟是《籠民》的導演，一齣把基層生活／社會問題描寫得算細緻的作品。《大公報》仲要引述張之亮的話，說武指董煒不惜跪地求d 臨記呢樣果樣，如何「為部戲」云云。為部咁既戲，駛唔駛呀。

劇情一︰大仁大義大波大

故事十分簡單。時唯戰國，趙十萬大軍，要攻燕。路經小國梁，只得四千人，順便打埋。梁向墨家求救。墨者劉華（革離）來援。到梁後，劉華一邊用計，連勝趙軍兩三次；一面對住屍體，狂講做乜要打仗，嘩，好似全世界得佢一個人尊重生命咁樣。

輸左幾次之後，趙將巷淹中扮退兵，梁王以為搞掂了，又見劉華盡得民心，就想收劉華皮。劉華當然走得甩。咁趙軍咪乘夜進襲，大破梁城囉，然後仲用全城百姓生命，要脅劉華翻黎添。劉華大仁大義，就梗係翻去啦。不過同時佢又係全劇中少數有腦的，所以一面翻去，一面安排一名佢救過的外勞掘地道，利用地下急流引起恐慌（該名外勞梗係同時要壯烈犧牲啦），再配合吳奇隆（梁國射擊冠軍）地面火攻反擊。咁梗係反擊成功啦。然後趙國將軍順便自殺囉。

劇情二︰扮上菜又唔捨得

過程之中，最犀利地難頂係感情線。梁國貴族范冰冰（逸悅）一見到劉華就嗒糖。劉華雖然感動，但死都扮冇野︰因為墨者唔可以受人恩惠，以免俾人覺得佢地做好事另有機心。即係撩到范兵兵磬烚烚，然後扮上菜，強調我唔係凡夫俗子，我志在四海，男女關係唔岩我。最後又要醒悟，回梁之後想搵番人。結局最煽情︰劉華大水反攻，偏偏范冰冰唔識游水，又要被梁王困在地底，一浸就死。一句講晒，劉華為救全城百姓，錯手殺左自己條女。仲唔激死你。

一字記之曰悶

兩個幾鐘裏面，大事件來來去去，趙軍十萬雄師的氣勢、鋪天蓋地的火海其實都沒有真正的build-up。即係如果阿仙奴對曼聯，就算有線電視的廣告再求其，都會俾番十年八載以黎兩軍打晒交的場面俾你睇丫，基昂怒串雲尼斯達萊，堅尼韋拉你推我撞……唔係咁我地點會覺得場波大喎，除非你係幾十年的老球迷啦。

所以都咪話唔悶，d 錢都咪話唔?。我地正值大勇之年的香港之寶劉華先生飾演的革離，是華語片史上其中一個最道貌岸然的無聊人。其實可以話，劉華真係完全冇發揮機會，而且「為自由而戰」的演說成個美國佬咁，十分嘔心。

不過劉華咁大犧牲，都造就左套戲其他人有番d發揮。其中少數的亮點，包括曾擔綱過《愛．作戰》的反派黃志文，飾演機心處處的梁王，不愚蠢、不過於表現才智、不浮誇、不平面，語氣表情步履都極之有 depth，觀眾估到佢人而估唔到佢下一步。另外，扮演趙將巷淹中的韓星安聖基都做得好落力。不過個角色其實唔係刻劃得好細緻。到最後，你只會知道佢係勝負重於生命的軍事家，而唔會知佢點解睇得咁重。當然，較諸劉華，安的角色始終都算係十分討好的。

兼與別︰劉華是浪子還是墨者

森秀樹的日本漫畫我沒有看過，墨家本身的學說我也不過只知道一點皮毛的二手料。不過單從二手料處，我也大概理解得到墨家其中一個重點思想是「兼愛」。「兼愛」的意思並非「愛」，而是「兼」，平等無差別的愛。能夠懂得兼愛的人墨家稱為兼士，相反則是別士。劉華在劇中說，如果趙國邀請佢幫忙守城，他一樣樂於應允。這樣就是「兼」的精神了。

不過，真正可以說明「兼別」的位置應該是劉華與范冰冰。因為唯有擺脫「愛情」（這其實是個現代概念）、家庭、部落、勢力的想像，將倫理秩序所提供的感情系統置放於生活中極後的位置，甚至視如不見，那人才能夠稱得上是兼愛的實踐者吧。

簡言之，導演講到一個人對所有人，都有強大的同情心便是兼愛者，便是墨者。不是吧！格外關心、喜歡自己身邊的人不正就是「別士」嗎？總之，劉華離開梁城後想覆焯范冰冰，最後范死左又繼續扮晒墨者浪遊四海，凡此種種，態度曖昧，可以話完全放棄了對墨家最刺激的觀點的討論。好似講到劉華開頭扮上菜的原因只係因為佢份人太過浪子，而非關「兼愛」的墨子學說咁。What a miss。現代社會其中一種最核心的秩序力量正是「別士」那種由近而遠的愛︰即助養非洲兒童或者支持最低工資立法都係好事，但就放係俾家用之後或者陪老公／老婆睇戲之後囉。贊同這種秩序力量固然主流，但更離譜的是一對扮見唔到的眼。張之亮於此難辭其咎。

反戰巴__閉

像兼愛一樣，在《墨攻》中同樣採取主流白痴立場的還有對待戰爭的態度。對著血流成河的屍體，我們只能見到道德發言人劉華痛心疾首的表情，或廢話連篇的深情演說。最重要的，對為何結怨、為何興兵黷武的分析就只有結局的字幕。字幕大致就係話梁城得以保全後天下如何繼續混戰，打打打。好像說這就是人的天性咁樣樣。

這和本地主流傳媒報道以巴糾紛、美伊中東衝突、科索沃系列戰事等等只報眼前發生的偽中立、去歷史作風有甚麼分別？文化仇恨、民族仇恨作為論述，如果不去梳解、釐清其中的歷史脈絡，我們只有焗住相信，科技發展下去，人類自己消滅自己乃不可避免的，第三次世界大戰乃不可避免的，人類的同情心並不能抵擋得了人類的野心與獸性。甚至，你要焗住相信，渣住個pass，才有資格按下你的家園的升降機的按紐，咁麻叉煩的生活程序也是不可避免的。因為你有錢，就有人打劫架啦，保安是不可避免的。所有政府做的衰野都是不可避免的，如果你唔打算去分析佢的話。

燒銀紙的社會

大概係咁啦。墨家作為戰國時代的顯學，都真係幾有趣、幾有個性的，很多觀點，——例如用效益主義來論證的兼愛，例如反音樂，例如反對對先人的過度祭祀與紀念，例如支持極權政制，例如對技術及科學有深刻洞見卻迷信鬼神——直到今天來說，都依然有其激進的意義。但是，《墨攻》非但沒有表現墨者的個性與「擇善」之固執，反而塑造了一個超級冇態度的劉華，於是最後這還是變了一場燒銀紙的大堆頭。是張之亮保守嗎，還是我們的電影市場、我們的社會容不下呢？

德州殺人

2006-12-12T18:12:00.000+08:00

乜都得小小，像這篇影評
——《德洲電鋸殺人狂︰成魔之路》

文︰阿邊個，即係我啦
原刊於《中大學生報》12月號

經典與垃圾之間的space

《德州電鋸殺人狂》（The Texas Chain Saw Massacre）是獨立電影史上的經典，一九七四年出品。我太年輕，沒有看過。但被認為是美國cult片重鎮。故事並唔係真人真事的。但靈感啟發自美國五十年代中的變態殺手 Ed Gein。

零三年有人翻拍，名字也叫《德州電鋸殺人狂》（The Texas Chainsaw Massacre），英文原名只差一個space，在「chain」和「saw」中間。搵左七四年版的導演做監製，攝影都係七四年原班人馬，但係導演就轉左個 MTV 導演。觀眾反應當然普通過七四年果齣好多啦。我也沒有看過，甚至唔記得香港有冇上過。

今次《成魔之路》則是零三年翻拍版的前傳。導演極之後生，得三十歲。七四年佢仲未出世。

情節︰悶中帶悶

作為前傳，今次的情節可謂格外無聊。因為我地都知道個結局嘛。兩個被召入伍的年青人，加上他們各自的女友，打算在打仗前再埋齋玩多次，於是四人駕車橫越德洲的無人小鎮。結局當然是給主角「皮面人」（leatherface）隊瓜晒啦。過程血肉橫飛，諸如此類啦。總之就係「年青人」+「想玩」+「皮面人」=「血」。係呢個位置度作為前傳實在十分冇想像力。你睇下《無間道二》的忠奸黑白大逆轉幾咁勁先得假。

傳奇的起點︰激進家族

《成魔之路》的宣傳金句係︰「Every Legend has a Beginning。」就皮面人的beginning呢方面黎講，它是合格的。

據CentralHorror.com影評人稱，零三年的版本最令人難以接受的地方是︰它竟為皮面人安置了一個受傷的童年，童年受傷，於是大個仔要報復。俗到癲。

今次前傳，似乎可以輕度 refute 呢樣野。因為今次描述埋皮面人的出生，原來佢係野仔，俾一個
食人家族師奶收養，咁所以成為殺人魔王。我意思係，今次，個導演好明顯更想強調︰個食人家族影響佢多過童年陰影觸發佢啦。呢個食人家族似乎是好勁的。女主角一問︰「你地係咪同近親交配，而唔係同自己鍾意的人做的呢？」嘩，戰線不止在應唔應該去越南，還在亂倫的正當性。而且，必要留意的是，食人家族只係癲。你唔會見到導演描述到佢地特別人渣。

恐佈︰唔恐佈

其實，所謂恐佈片的恐佈，通常都再分血腥、驚慄同暴力。咁呢齣《成魔之路》，就可以話完全唔驚慄。因為佢裏面的「驚慄」只係用重力的聲音。情節一d 懸念都冇。

血腥︰等出dvd啦

至於血腥都只係普普通通。相對於真人真事的Ed Gein情節，可謂小兒科。Ed Gein 據稱是殺了一些人（數量唔知），又掘起一些中年女人的屍體，然係用她們的乳頭製作皮帶，頭蓋骨製成湯碗，咀唇製成頸鏈之類。唯一同Ed Gein 一樣的是《成魔之路》中的皮面人，在湯開靚仔男主角一後，順便界埋佢塊面出黎，做mask，貼上自己度。可見皮面人其實要自尊多過要人條命。真係唔慌唔係「界仔」喇。不過當年Ed Gein 的mask是否為了好樣就唔係咁知。總之就係No Pain, No Gein啦。

暴力︰反客為主

至於暴力鏡頭，都幾好，有兩野都幾夠暴力。第一野就係後來被人界走塊面的男主角一為了逃生，不惜將一張檯夾向皮面人家族的tea lady 度。該位 tea lady重逾三百磅，由其中一個最面擅的荷里活甘草Kathy Lamkin飾演，都咪話唔驚佢爆。第二個鏡就係男主角二為了報復皮面人叔叔，食人家族的大腦假警長凱特（Ermy飾演），就打鑊佢。將佢，一個五十歲的阿伯，個頭，係咁大大力撖落個石屎地度，十幾廿下。

真正有趣的地方是，兩個鏡頭的暴力行使者，都係年青人而唔係皮面人家族囉。同埋，受害的肥茶女與假警長被害之後都再冇出過場，但零三年的正傳版本仲有佢地，冇死到。對於係咪蓄意refute正傳呢點，導演扮晒野，留左條尾巴。

動物與人

好喇，臨尾，又係時候講兩句道理。《成魔之路》最有味道的道理辯論就係假警長的老吹。

佢吩咐皮面人︰「血還血，肉還肉，分清楚。」又同男主角一話︰「細個老豆教，一個好的農夫，要令到d牲畜乾淨d。」係呢度，其實inspire左一個得意的地方︰就係所有佔盡道德高地去高呼動物權益的人，佢地所講的讓動物擁有人的權益，同假警長的態度，待人如待動物，其實都不過一銀兩面姐。係咪？有人會覺得，弱肉強食，人難免要一定程度上欺凌別的物種，前者的想法未免一廂情願，甚至虛偽；不過，面對夠晒激進的後者，我／你咪又接受唔到！

最最最後，有人批評對皮面人的描寫是太少了，都唔進人到佢內心講佢點解成魔。但我又好似覺得，今次皮面人的演出是很好的，既subtle，又有智慧。佢作為一個alien，是我地唔應該、也沒有能力明白佢真正的心理、真正的成魔之路的。

錫菲聯 2 維拉 2

2006-12-12T15:17:00.000+08:00

今年少數精彩的比賽。兩邊都放棄地波，大踢高波。尤其是主隊。至於六十分鐘後維拉門前風聲鶴唳，而佢地如何能力保一分至完場，到而家都係個謎。史特勞太萊睇落好波過蘇連信好多。

兩邊都有怪招的。

例如錫菲聯無論得到個幾遠的自由球，維拉都排人牆，結果的確係令基利士比斬得大力左，或更經常咁斬去遠柱。

而錫菲聯方面亦勁。每次界外球都有叫糊之感。右邊古斯陸、左邊邦比，掟之前都會交俾主場執波仔再抹一抹，個波乾身一點，自然掟得遠。同時，佢地在後半場博得界外球後，唔會諗住掟番俾自己友，而係掟向前近角球旗的維拉守衛處，望佢地頂出界，可以博到一極具威脅之界外球。

侯斯果然是空中霸王，但韋伯企得太遠，唔係成日搵到著數。相反維拉，瑟頓亦係所有 good move 的 central player，巴路士追平的一球正係瑟頓撞死兩個中堅然後巴路士輕鬆執雞。

維拉繼續 play bad but draw，對所有人黎講都唔係好事。因為佢地由平安夜前夕開始，到一月十三號為止，將會三戰曼狗，同埋主場迎戰車路屎。所以維拉的唯一生存之道，就係輸輸輸，一路輸落去，咁去到對曼狗同車屎時，就可以破斧沉舟，大殺四方喇。仲可以食住個勢下年力保無聊中游添。

不過奧尼爾睇黎唔係咁諗，佢客場出史堤芬戴維斯正選，末段俾人攻到三魂唔見七魄時才換入奧斯邦尼，似乎係幻想全取三分的。可惜錫菲聯的高空攻勢太勁啦。

man of the match︰史特勞太萊

http://www.youtube.com/watch?v=1lYMLn8zWgs

以為無聊就轉場

2006-12-12T15:03:00.000+08:00

xanga 轉了中文，d link錯晒。於是繼續維持我的無原則作風︰轉場。
舊場︰http://xanga.com/horror_tackle